Lulet janë ato që e zbukurojnë ambientin ku jetojmë, qoftë në dhomë, qoftë në kopsht, sepse krijojnë mjedis tërheqës dhe ofrojnë prehje. Nga shekulli në shekull lulet janë pjesë e familjeve të pasura dhe varfra. Kujdesi dhe dashuria për to sa vjen e shtohet.
Të marrësh një buqetë apo vazo me lule si dhuratë është e çmueshme për cilindo nga ne. Si të rinjtë ashtu dhe të vjetrit, si shqiptarët ashtu dhe të huajt i kushtojnë rëndësi dhe kohë luleve në oborret e shtëpive private, por edhe në brenda apartamenteve.
Shpesh herë nga një vizitë te komshiu nuk kthehemi duar bosh, por marrim një rrënjë apo degë të një luleje, e cila nuk ndodhet në ballkonin e shtëpisë tonë, e kështu shtojmë numrin e tyre në banesat tona.
Mirëpo lulet duan një kujdes të veçantë në jetëgjatësinë e tyre. Ushqehen me pleh, dritë dhe me temperaturë pothuajse konstante. Pija e tyre kryesore është uji, i cili iu lëshohet direkt te rrënja, si dhe spërkatja e herë pas hershme mbi gjethet apo lulet që ato lëshojnë. Një rol të madh luajnë dhe stinët në gjelbërimin dhe rritjen e tyre. Të gjithë e dimë që pranvera është stina e luleve. Temperatura e kësaj stine, shirat e butë janë ushqyesit e ideal për lulet.
Kujdesi ndaj luleve në stinën e dimrit
Të gjitha zonjat apo zotërinjt, të cilët kanë lule në shtëpitë e tyre, ndiehen të kërcënuar ndaj stinës së dimrit. Në mënyrë të veçantë ata banorë që jetojnë në qytetet e ftohta si kukësi, tropoja, puka, korça, pogradeci etj. Në këto qytete dëbora është e pranishme çdo dimër. Nëse lulet tuaja qëndrojnë në oborrin e shtëpisë është e këshillueshme që gjatë motit me borë, breshër apo me shi të rrëmbyeshëm, duhet t’i mbuloni lulet siç mbulohen serat bujqësore. Në këtë mënyrë ju i krijoni temperaturë luleve tuaja duke i mbrojtur nga ngricat dhe erërat e forta. Gjithashtu duhet treguar kujdes në momentin që moti përmirësohet, ju duhet t’i zbuloni menjëherë ato. Temperatura e luleve gjatë kësaj stinë duhet të jetë 10-12 gradë.
Ndërsa temperatura në ambientin e shtëpisë duhet të jetë konstante dhe nuk duhet tepruar me mjetet ngrohëse, si kondicioneri apo soba, pasi ato i dëmtojnë lulet tuaja.
Ujitja dhe kujdesi nga parazitët
Kujdes me ujitjen gjatë stinës së dimrit. Lulet janë si gjallesat, kanë etje kur është shumë ngrohtë dhe kur është ftohtë duan më pak ujë, prandaj mos i ujitni asnjëherë lulet nëse plehu ku ato qëndrojnë është i lagur, pasi uji i tepërt i kalb ato. Gjatë qëndrimit në vendin ku do të dimërojnë, duhet shikuar herë-herë me thjerrëz, në mënyrë që t’i vëreni në kohë dhe t’i zhdukni parazitët, në qoftë se shfaqen të tillë.
Krasitja dhe përzgjedhja e bimëve
Të gjithë të pasionuarit pas luleve duhet që për çdo lule që blejnë apo iu dhurohet të mësojnë karakteristikat e lules së re. Jo çdo lule rri e gjelbëruar në çdo stinë. Pothuajse 70 % e luleve janë sezonale, që do të thotë që gjatë stinës së vjeshtës apo të dimrit iu bien gjethet dhe rigjelbërojnë në pranverë, pak a shumë përngjasojnë me bimët frutore.
Prandaj për t’i shijuar lulet çdo stinë duhet të përzgjedhim lulet që i rezistojnë çdo stine.
Duhet ditur se krasitja e bimëve bëhet në fundin e stinës së vjeshtës apo fillim dimri dhe jo më vonë, në të kundërt riskon jetëgjatësinë e tyre.
Disa këshilla të dodmosdoshme për lulet në stinën e vjeshtës dhe të dimrit
vjeshtë
– Gjatë vjeshtës është mirë që të përdorni ushqyes për bimët në mënyrë të vazhdueshme (1 herë në 3 ujitje).
– Nga mesi i vjeshtës, në varësi të ambientit duhet ulur doza e ujitjes.
– Nga mesi i tetorit është periudha më e mirë për të mbjellë bulba, si p.sh. Tulipanët.
– Këshillohet të bleni lule sezonale për këtë periudhë.
– Nga fundi i tetorit është e këshillueshme që të futen brenda bimët e ambientit të brendshëm nëse i keni nxjerrë jashtë.
– Dita fillon e zvogëlohet dhe dielli nuk është më i fortë. Mund t’i lini lulet në diell gjatë kësaj periudhe, edhe ato që gjatë verës i keni vendosur në hije.
dimër
– Të kini kujdes bimët që nuk e durojnë të ftohtin.
– Mos i vendosi lulet afër kaloriferëve.
– Lulet e ambienteve të brendshem të mos prekin xhamat e dritareve.
– Gjatë periudhës së ngricave nuk përdorim ushqyes apo plehra të ndryshem tek bimët e ambientit të jashtëm.
– Vetëm tek bimët e ambienteve të brendshëm përdoren ushqyes të lëngshëm.
– Kujdes tek pjatat e vazove mos lini ujë se ka rrezik të ngrijë dhe dëmton lulen.
– Kujdes i veçantë tek gardenia dhe bughainvillea, ngricat i dëmtojnë.
– Është mirë që lulet e ambienteve të brendshem të spërkaten me ujë sepse në dimër ajri brenda në shtëpi është i thatë si pasojë e ngrohjes që përdorim.
– Në asnjë mënyrë nuk duhet të bëni ujitje në darkë gjatë periudhes së dimrit.
