Ti u zbukurove me thinja
Por shpirti s’tu mplak kurrë.
Ti do të mbretërosh ndër vargje
E bukur, e brishtë si dikur.
E dashur nënë, ti më lëkundje në djepin e dashur të fëmijërisë
Gjithqysh fëmijë të kisha mbetur pranë burimit të dashurisë.
Ti me kohën pakt nuk bëre
Nuk kërkove as mëshirë.
Ti shumë gjëra në jetë deshe
E kërkove, të paktën lumturi.
Shumë dashuri dhurove pa asgjë në këmbim
Në zemrën time skalite, pranverat me diell e gëzim.
U rrudhe në të shumtat vështirsi
E askush s’të mbajti përdore.
U trazuan dallgët e shpirtit tim
E nga dora kurrë s’më lëshove.
Mbijetove në betejat e shumta
Që veç shpirtit, s’ti din askush.
Ta prishi gjumin një rënkim.
E netët u zbardhën me ty zgjuar.
E përvuajtur me nise në jetë
E ndrojtur dhe mallin pa shuar.
Për ty nënë stina shumëngjyrëshe
Zgjat përjetë në një shikim.
Në sytë e tu, pasqyruar
Hije e lehtë… imazhi im!
Fluturim Nela
